صرخه شعب ‏

..... صرخة شعب .....


اخوي الساكن الخضراء ..... أترجـاك تسمعنــــي
خليــك بسعادة وخيـــــر ..... وانه بضيمي اتركني



انه ابن الشعب تدرون ماعندي ضوه ولا ماي
والإرهاب فوكاها يطاردنــي ....
حلم الأمان وراح وين الكاه ،
لا بالشغل لا بالسوك لا بالبيت
وين أنطي الوجه لا وين ؟ فهمني ....
إذا انتوا الاباتشي واف مدري شكد تحرسكم ،
ناموا رغد يااخوان
وآنا السهر مدري الخوف كاتلني ....
يومية اجتماع بمجلس النواب ،
يامشروع انجزتوا اليخدمني ؟ ....
تجتمعون يااخوان متوحدين
وتطلعون يااخوان مختلفين
أترجاك شنهو السبب فهمني ؟ ....
لكن للحقيقة اشهد فد مره اتفقتوا ولا اعترض واحد ،
تدري شوكت ؟
من حددتوا راتبكم "
جم مليون ؟
آنه نسيت ذكرني ....
أتمنى انتخاب أيصير يااخوان
وشوفوا كل الشعب
ماينتخب صدكني ....
بعد ماننخدع يا قادة الأحزاب
ماننتخب لاشيعي ولا سني
اخوي الساكن الخضراء .....
لاتزعلون بعد اللي جرى والصار كلي شتنتظر مني ؟ ....

.... اخوي الساكن الخضراء ....
شعبنا كلكم تعرفوه ...
نسيجه واضح ومعروف
من عربي ومن كردي ومن شيعي ومن سني ....
من شيعة علي آنه ،
وجاري الله يحفظه جار العمر سني ....
خطب أختي لابن أخته وبنته آنا خطبت لأبني
وصار سنين متوحدين يااخوان
وأهل الطرف ماتعرف منو الشيعي ومنو السني ....
نصلي سوه بجامعنا وجامعهم
وحتى للزيارة وياي أيد بأيد صدكني ....
لكن من اجيتوا يااخوتي الدين صار أحزاب ....
وكل مذهب مذاهب صار
وآنا الانتظر رديت ،
ياوسفه وألف حيف
ولا واحد سأل عني ، ....
تبين يا إخوتي التفرقة يمكم ,
فرقتوا الشعب والدين
وهسه باسم الدين اليوم تحكمني ....
إذا انتوا إخوتي وماترحموني ،
شلون الأجنبي ياناس يرحمني ....

.... اخوي الساكن الخضراء ....
أرد انخاك
إذا يمك قضيتي ....
خل عينك علي ولا تعذبني ....
وإذا بس بالاسم هم نايب ومسؤل ..؟
عليش اعتب عليك أرجوك سامحني ....
أحلفكم إخوتي وببش أحلفكم..

بتراب العراق ونخله والنهرين
إذا انتوا صدك لأجل الوطن تسعون
ويهمكم وطنا مثل ميهمني ....
اتركوا كل خلاف ووحدوا جلمتكم
وخل نمشي سويه وللوطن نبني ....
لو طاح العراق وداسته العدوان
ميرحمون يا إخوان لا شيعي ولا سني
المايسوه العتب مالي شغل وياه
بس أهل العقيدة كون تسمعني ....
الشيعي يلتزم بأخلاق أهل البيت
وعلى سنة عمر امشي أخي السني ....
عدنا أهداف مشتركة توحدنا...
رب واحد .. نبي واحد .. كتاب واحد ..
وقبلة فد وحدة..
أهداف العقيدة بيك تربطني
أخي السني ..
عليش الأجنبي بالسر يفرقني ؟
ولو يسأل السائل بوية أنت منين ؟
أكله آنه عراقي وبس ...
لا عربي ولا كردي ولا شيعي ولا سني...